FASILIDADE

Baucau- Conferência Episcopal Timorense (CET) liu-hosi Comissão Nacional Educação Católica Timor-Leste (CONECTIL) hala’o disseminação no formação kona-ba Manual Aluno, ba professor sira educação moral no religião católica nebé mak mai hosi ensino secundário geral no técnico vocacional, 10º ano escolaridade. Disseminação no formação nebé mak hala’o iha Baucau Vila, fahe ba grupo rua: professor sira hosi Município Baucau nian tuir formação iha Sala encontro departamento educação Diocese Baucau (DB) no professor sira hosi município Lautém-Manatuto tuir formação iha sala encontro Fundação São José DB. No actividade ne’e hala’o durante loron tolu; hahú hosi loron 20 to’o 22 fulan Fevereiro tinan 2025. Actividade ne’e rasik facilita hosi espetor CONECTIL nebé destaca iha município tolu, mak hanesan: Juliantino Pinto, destaca iha município Baucau; Tito Luizinho, destaca iha município Manatuto; no Benedito Pinto, destaca iha município Lautém. Formador sira hamutuk nain hat: Madre Lúcia S. de Deus, Mestre Guilerme Bonifácio, Pe. Marçal Sequeira no Mestre João Belo. Antes atu hahú formação, CONECTIL distribui livro manual, Bíblia Sagrada (tradução lian tetun) no Hananu ba Na’i ba professor sira ho esperança ida katak livro hirak ne’e bele sai nudár referência wainhira professor sira prepara matéria molok hanorin.